ദുബായ് നഗരത്തിന് ഇനി ഉല്ലാസത്തിന്റെ രാവുകൾ. കോവിഡ് മഹാമാരിയെ തുടർന്ന് കൊട്ടിയടച്ച വാതിലുകള്‍ ഓരോന്നായി തുറന്ന്, ആഹ്ലാദം നിറഞ്ഞ പുതുലോകമൊരുക്കുകയാണ് ദുബായ് നഗരം.നാടും നഗരവും ആഘോഷത്താല്‍ മുങ്ങുന്ന ദുബൈ ഷോപ്പിങ് ഫെസ്റ്റിവലിന് (ഡി.എസ്.എഫ്) ഗംഭീരമായ തുടക്കം കുറിച്ചു. എമിറേറ്റിലുടനീളമുള്ള വ്യാപാര-വാണിജ്യ സ്ഥാപനങ്ങളെ പങ്കാളികളാക്കി ദുബൈ സംഘടിപ്പിക്കുന്ന ലോകത്തിലെ തന്നെ പ്രധാനപ്പെട്ട ഷോപ്പിങ് ഉത്സവമാണ് ദുബൈ ഫെസ്റ്റിവല്‍സ് ആന്‍ഡ് റീടെയ്ല്‍ എസ്റ്റാബ്ലിഷ്മെന്‍റ് (ഡി.എഫ്.ആര്‍.ഇ) നടത്തുന്ന ദുബൈ ഷോപ്പിങ് ഫെസ്റ്റിവല്‍. കണ്ണഞ്ചിപ്പിക്കുന്ന കാഴ്ചകളേറെ നിറച്ചുവെച്ച ദുബൈ നഗരം ഇനി ഒരുമാസക്കാലം നിറദീപങ്ങളിലേക്കാണ് മിഴിതുറക്കുന്നത്.
പതിവിനു വിപരീതമായി ഇക്കുറി ഇത്തിരി നേരത്തേ തന്നെ വിരുന്നെത്തിയ ഷോപ്പിങ് മാമാങ്കത്തിന് ഇന്നലെയാണ് തുടക്കമായത്. ക്രിസ്മസ്, പുതുവത്സര നാളുകളിലും ഇരട്ടി ആഘോഷങ്ങള്‍ക്ക് വഴിതുറക്കുന്ന ഡി.എസ്.എഫ് 2021 ജനുവരി 30 വരെ തുടരും. വ്യാപാര സ്ഥാപനങ്ങളില്‍ പരിശോധന നടത്തി കോവിഡ് വിമുക്തമെന്ന ദുബൈ അഷ്വേഡ് മുദ്ര നല്‍കിയാണ് ഇത്തവണത്തെ ഡി.എസ്.എഫ്. സമാനതകളില്ലാത്ത ഷോപ്പിങ് ഉത്സവം ഇത്തവണയും നടത്താന്‍ കഴിയുന്നതില്‍ അഭിമാനമുണ്ടെന്ന് ഡി.എഫ്.ആര്‍.ഇ സി.ഇ.ഒ അഹമ്മദ് അല്‍ ഖാജാ വ്യക്തമാക്കി. മാളുകളിലും ഷോപ്പിങ് കേന്ദ്രങ്ങളിലും വിനോദ പരിപാടികളും കരിമരുന്ന് പ്രയോഗങ്ങളും നടക്കും. പുതു വത്സരത്തോടനുബന്ധിച്ച്‌ പ്രത്യേക പരിപാടികളുണ്ടാവും.
കേവലം ഷോപ്പിങ് അല്ല, മറിച്ച്‌ വിനോദങ്ങളുടെ മേളയാണ് ഡി.എസ്.എഫ്. കുടുംബങ്ങള്‍ക്കുള്ള വിനോദപരിപാടികള്‍, തത്സമയ സംഗീത പരിപാടി, ഇന്‍സ്റ്റലേഷന്‍സ്, സ്റ്റേജ് ഷോ തുടങ്ങിയവ ഉണ്ടാവും. ഓഫറുകളുടെയും സമ്മാനങ്ങളുടെയും പെരുമഴക്കാലം. കോവിഡിനെ തുടര്‍ന്ന് മന്ദതയിലായ വിപണിക്ക് ഡി.എസ്.എഫ് ഉണര്‍വേകുമെന്നാണ് കരുതുന്നത്. കോവിഡിെന്‍റ പശ്ചാത്തലത്തില്‍ നിയന്ത്രണങ്ങളോടെയായിരിക്കും ഷോപ്പിങ് ഫെസ്റ്റിവല്‍. എങ്കിലും, ആഘോഷത്തിന് ഒരു കുറവുമുണ്ടാകില്ല.
ബ്രാന്‍ഡ് ഉല്‍പന്നങ്ങള്‍ മുതല്‍ തദ്ദേശീയ നിര്‍മിതി വരെയുള്ള ഉല്‍പന്നങ്ങള്‍ക്ക് അവിശ്വസനീയമായ വിലക്കുറവാണ് ഉപഭോക്താക്കള്‍ക്ക് ഡി.എസ്.എഫ് ഉറപ്പുനല്‍കുന്ന ആദ്യ സമ്മാനം. ദുബൈയിലുടനീളമുള്ള 3500ല്‍പരം സ്ഥാപനങ്ങളിലും ഷോപ്പിങ് മാളുകളിലും സൂപ്പര്‍ മാര്‍ക്കറ്റുകളിലും വരെ വിസ്മയിപ്പിക്കുന്ന ഇൗ ഓഫര്‍ ലഭ്യമാണ്. 3500 വ്യാപാരസ്ഥാപനങ്ങളില്‍ 25 മുതല്‍ 75 ശതമാനം വരെ വിലക്കുറവാണ് ഇപ്പോള്‍ പ്രഖ്യാപിച്ചിട്ടുള്ളത്. ഒപ്പം, സ്ഥാപനങ്ങളുടെ പ്രത്യേക ഓഫറുകളും കൂടിച്ചേരുമ്പോൾ തകര്‍പ്പന്‍ ഷോപ്പിങ് തന്നെ നടത്താമെന്ന കാര്യത്തില്‍ സംശയമില്ല.
ലക്ഷ്വറി കാറുകളും ലക്ഷക്കണക്കിന് രൂപയുടെ സമ്മാനങ്ങളുമാണ് ഉപഭോക്താക്കളെ കാത്തിരിക്കുന്നത്. ആനന്ദകരമായ കാഴ്ചകള്‍ക്കും അതിശയ ഷോപ്പിങ്ങിനും അരങ്ങൊരുക്കുന്ന ഡി.എസ്.എഫ് വലിയ വിലക്കുറവിനൊപ്പം വമ്പൻ സമ്മാനങ്ങളുമൊരുക്കുന്നുണ്ട്. ഇന്‍ഫിനിറ്റി മെഗാ റാഫിളില്‍ 200 ദിര്‍ഹം ടിക്കറ്റുകളുടെ നറുക്കെടുപ്പ് ദിവസവും നടക്കും. 45 ഇന്‍ഫിനിറ്റി ക്യു.എക്സ് 60 കാറുകളാണ് വിജയികള്‍ക്ക് നല്‍കുക. പ്രതിദിനം രണ്ടുലക്ഷം ദിര്‍ഹവും സമ്മാനമുണ്ട്. ഇതിനുപുറമെ സമാപന ദിവസത്തിലെ വിജയിക്ക് കാറും അഞ്ചുലക്ഷം ദിര്‍ഹവുമാണ് സമ്മാനം.
25 കിലോ സ്വര്‍ണവും ആഡംബര കാറുകളുടെ വന്‍ നിരയും വിവിധ ദിവസങ്ങളിലെ നറുക്കെടുപ്പില്‍ ജേതാക്കള്‍ക്ക് ലഭിക്കും. ലക്ഷക്കണക്കിന് ദിര്‍ഹവും 45 നിസാന്‍ കാറുകളും സമ്മാനമായി ലഭിക്കുന്ന ഇന്‍ഫിനിറ്റി മെഗാ റാഫിള്‍ ടിക്കറ്റിന് 200 ദിര്‍ഹമാണ് വില. ഇനോക്, എപ്കോ എന്നിവയുടെ തെരഞ്ഞെടുത്ത പെട്രോള്‍ ബങ്കുകള്‍, സൂം സ്റ്റോര്‍, മെട്രോ സ്റ്റേഷനുകള്‍ എന്നിവിടങ്ങളില്‍നിന്ന് ടിക്കറ്റുകള്‍ സ്വന്തമാക്കാം. മാത്രമല്ല, ഗോള്‍ഡ് സൂഖ്, ഗ്ലോബല്‍ വില്ലേജ് എന്നിവിടങ്ങളില്‍ 200 ദിര്‍ഹം ചെലവഴിക്കുന്നവര്‍ക്കും ഷോപ്പിങ് ഫെസ്റ്റില്‍ പങ്കാളികളാവുന്ന മാളുകളില്‍നിന്നുള്ള 200 ദിര്‍ഹമിെന്‍റ പര്‍ച്ചേസിനും റാഫിള്‍ ടിക്കറ്റുകള്‍ ലഭിക്കും
ദുബൈ ഗോള്‍ഡ് ആന്‍ഡ് ജ്വല്ലറി ഗ്രൂപ് സംഘടിപ്പിക്കുന്ന ഗ്രാന്‍ഡ് റാഫിളില്‍ 25 കിലോ സ്വര്‍ണമാണ് സമ്മാനം. ദുബൈയിലുടനീളമുള്ള 180 ഔട്ട്ലെറ്റുകളില്‍നിന്ന് 500 ദിര്‍ഹമിന് സ്വര്‍ണം, ഡയമണ്ട്സ്, പേള്‍, വാച്ചുകള്‍ എന്നിവ പര്‍ച്ചേസ് നടത്തുന്നവര്‍ക്ക് റാഫിളില്‍ പങ്കെടുക്കാം. കൂപ്പണ്‍ നറുക്കെടുപ്പിലെ വിജയികള്‍ക്ക് ആകെ 25 കിലോ സ്വര്‍ണമാണ് സമ്മാനമായി കാത്തിരിക്കുന്നത്. നാലുപേര്‍ക്ക് ഒാരോ കിലോ സ്വര്‍ണവും 12 പേര്‍ക്ക് മൂന്നു കിലോ സ്വര്‍ണവും ലഭിക്കും. അവസാന ദിവസത്തെ മെഗാ സമ്മാനത്തിനു പുറമെയാണിത്.
